قائمة في المفردات الخشبية التونسية

نحب نفهم علاش فما كلمات عربية فصحى خاصة كان بتونس أو بالأحرى خاصة كان بوسائل الإعلام التونسية دون سواها من الوسائل الإعلام العربية الأخرى يعني كي نتفرجو على أخبار تونس 7 فما كلام ماتلقاهوش في حتى أخبار متاع أي قناة عربية أخرى.
وهذي عينة على سبيل الذكر من هذه الكلمات

Liste non exhaustive des concepts de bois arabes purement tunisiens :
عناية موصولة
تثمين الخيارات الرائدة
استشارة وطنية/تنموية
تكريس سيادة الشعب
القرارات الرائدة التي أذن بها
نثمين/ مباركة /تنويه /إعتزاز /فخر بالقرارات
مناشدة
تكريس سيادة الشعب
برقية تنويه
رفع التحديات
مشاعر التقدير و الإكبار
ميثاق وطني
تكريس التعددية
تعزيز إشعاع البلاد في المحافل الدولية
تكريس سنة الحوار
الثوابت الوطنية
أطر التعاون
تفعيل الدور
المشاعر النبيلة و الحميدة
قيم التضامن و التآزر
الرؤية الإستشرافية
بكل نخوة و اعتزاز
مسيرة الإصلاح و التنمية
نموذج يحتدى به

وفي نفس الإطاربعض الحلول السحرية اللي تمشي مع كل حاجة و في أي وقت
إنشاء صندوق/وطني/عالمي ل...
صياغة ميثاق
إنشاء مرصد /لجنة/مركز
تعزيز سبل التعاون
حوار مع الشباب
ترشيد
كسب الرهانات
الوعي برهانات الحاضر و المستقبل
تشجيع المبادرة
عدم الإستقواء بالأجنبي

وباش تتأكدو من ها الحكاية يكفي أنك تكتب الكلمة الخشبية في محركات البحث كيما قوقل مثلا. باش تلقاو أنو ما يقارب من 100 %من المواقع اللي تستعمل هذه الألفاظ الخشبوية هي تونسية كي

Alhorria
Alakhbar
TAP
lapresse

etc

دور الزبالة في تحقيق العدالة

كل صباح وأنا ماشي للخدمة نلاحظ ظاهرة مؤسفة برشة متمثلة في تردد ثلة من المواطنين على حاويات الزبالة متاع البلاصات و تتكون هذه المجموعات من جميع الأصناف العمرية و حتى من الأطفال و هذا الشيء نلقاوه في جميع الأحياء و خاصة الراقية منها . حسب علمي مكناش نشوفو ها المشهد في الماضي القريب و كان مختصر على بعض المجانين أو بعض الفقراء أما اليوم نلاحظ أنو الظاهرة كبرت برشة و لا ثما تنافس و اكتظاظ كبير على الحاويات في مشهد يذكرنا بالميزيريا اللي نشوفوها في التلفزة في بعض البلدان الفقيرة و اللي كنا نحسبو رواحنا طيارة عليهم ياخي طلعنا أتعس منهم خاتر هوما قاعدين يقدمو و حنا قاعدين نوخروا.
الكل بعرف أنو الظاهرة هاذي قاعدة تكبر و تنذر بسوء أما حد ما قاعد يحكي عليها و بالطبيعة المشكل لا مطروح ولا الحلول قاعدة تتناقش يعني سياسة تسييب الماء عالبطيخ هي سيدة الموقف كي العادة. ولا هذي تابعة لسياسات العدالة الإجتماعية و المخططات التنموية عن طريق رسكلة النفايات

الفراغ الثقافي و التخدير الكروي

نحب نعتذر أولا للإخوة متاع البلوقوسفار لأني لم أدون منذ شهر جانفي و ذلك لأني كنت ديكوناكتاي و لاهي نقرى على روحي أما ديما نتبع النقشات متاع الجماعة ب ت ب , كلندو , طارق, سمسوم , خيل , بودورو...
اما بعد
قاعد باهت وين وصل النيفو متاعنا و متاع تلافزنا . اتصورو قنواتنا "الوطنية" الزوز اللي ولاو أتعس من قناة السودان جايبين في السهرية متاع الأحد برامجهم الرياضية الزبالة كي العادة (أحد رياضي + حصاد 21 يضهرلي) في الأولى جايبين خبر عاجل اتحاد فوشانة من رابطة الهواة لكرة القدم ربح الملعب الرادسي وطلع للقسم السابع عشر متاع جد بوهم الكلب وفريق تلفزي كامل يصور و يورينا حجرات الملابس الخامجين و الميزيريا الكلبة و أما في القناة 7 جايبن زوز حومات من القسم الخامس و السبعين يلعبو في الكورة في بطحاء وتصريحات و مبعوثين من قناتنا الوطنية و عرك و بونية بين فصايل الحومتين حاصيلو فضيحة كبيرة في الوقت اللي فيه أكبرعباد تتفرج.

اللي يوجع القلب و يخليك تحب تعمل محاكمة للجماعة اللي يخدمو في تونس 7 و 21 و اللي ملقاو ما يوريو كان ها المناظر و ها الأخبار اللي ما تهم حد للعالم كلو عن طريق الفضائيات . اتصورو واحد ألماني و لا بريطاني قدام التلفزة متاعو قلب القناة يلقى الفضائية 7 و لا 21 تجيب في ها المهزلة و هو كان يخمم يزور تونس يعدي فيها أيامات باش يتفرهد يشوف الحالة هذي توا مازال يرمي ساقو في ها البلاد . تي عالأقل الخنار هذا عديوه في الشبكة الأرضية مو ش عا البارابول.
وكان تلاحظو عندهم مدة يجيبولنا كل ليلة في التسعة متاع الليل برنامج رياضي في إحدى القنوات الثلاثة و ثما ليلة يعديو برنامج رياضي في كل قناة و في نفس الوقت يعني اللي ما يحبش الكورة يموت مغبون و ما عليه كان يطفي التلفزة و يرقد على بكري حفاظا على الطاقة

حاصيلو كما يقول المثل الفرنسي
"heureusement que la connerie ne tue pas "